«Саракі» ў аграгарадку Дварэц

У рамках раённага этна-праекта “Народнаму скарбу  — век векаваць” у аграгарадку Дварэц Дзятлаўскага раёна 24 сакавіка адбылося фальклорнае свята “Саракі”, традыцыйны прыход вясны з правядзеннем старажытных абрадаў і рытуалаў. Абрадавыя дзеянні інтэрактыўнага абраду «Саракі» прадэманстравалі ўдзельнікі дзіцячага клуба народных традыцый «Крыніца» Дварэцкага Дома культуры.

Адным з элементаў свята Саракі з’яўляецца традыцыя ўпрыгожваць рознакаляровымі стужкамі кола. Вясновае кола з рознакаляровымі стужачкамі сімвалізавала надзею, што неўзабаве прыляцяць усе сорак птушыных стай у наш край, а ўраджай бягучага года будзе лепш і багацей папярэдняга.

Хлопцы і дзяўчаты з задавальненнем вадзілі карагоды, гулялі ў “Чыжыка”, збіралі сорак пруцікаў, гукалі птушак і частаваліся салодкім печывам.

Вясновае свята Саракі атрымалася яркім і маляўнічым.