Пасля ўрачыстага адкрыцця фестывалю сямейнага адпачынку “Зецельскі фэст” старшыня райвыканкама Андрэй Садоўскі запрасіў гасцей раёна – члена Савета Рэспублікі Нацыянальнага сходу Рэспублікі Беларусь, дэпутата Гродзенскага абласнога Савета дэпутатаў Андрэя Жамойду і старшыню камітэта па працы, занятасці і сацыяльнай абароне Гродзенскага аблвыканкама Вольгу Сядзельнік – на аглядавую экскурсію па горадзе, якую правяла дырэктар Дзятлаўскага гісторыка-краязнаўчага музея Вераніка Паўлоўская.
Яе ўдзельнікі прайшлі па вуліцах Міцкевіча і Перамогі, каб наведаць старую гарадскую царкву Праабражэння Гасподняга і новы сабор навамучанікаў і спаведнікаў Царквы Рускай. Гісторыю храмаў расказаў благачынны цэркваў Дзятлаўскай акругі іерэй Іаан Кісель, узгадаў самых вядомых святароў, якія былі настаяцелямі Праабражэнскай царквы і за добрыя ўчынкі пакінулі аб сабе памяць.
Затым удзельнікі экскурсіі прайшлі па вуліцы Чырвонаармейскай, палюбаваліся прыгожай гарадской набярэжнай, фантанамі, пацікавіліся, як у Дзятлаўскім цэнтры карэкцыйна-развіваючага навучання і рэабілітацыі ў доміку-альтанцы прыжыліся вавёркі Коржык і Карамелька.
Наступным на шляху экскурсантаў быў гістарычны цэнтр Дзятлава – вуліца Першамайская, дзе раней знаходзіліся яўрэйская сінагога і мясцовая лазня. Далейшая іх дарога ляжала ў адзін са старажытнейшых аб’ектаў райцэнтра – касцёл Унебаўзяцця Найсвяцейшай Панны Марыі, пабудаваны ў 17 стагоддзі, фундаваны ўладальнікам мястэчка Вялікім Канцлерам Літоўскім Львом Сапегам і яго сынам Казімірам. З гісторыяй і архітэктурай храма прысутных азнаёміў яго настаяцель, ксёндз-пробашч Андрэй Лішко, паказаў старыя кнігі-метрыкі і калону, у якой замураваны сэрцы Мікалая-Фаўстына Радзівіла, яго жонкі Барбары і сына Ежы.
Пасля выхаду з касцёла ўдзельнікі экскурсіі зноў спыніліся на плошчы 17 Верасня, каб ажыццявіць падарожжа ў мінулае і ад гіда-экскурсавода Веранікі Паўлоўскай пачуць, каму належалі прыгожыя “пернікавыя” домікі (мікрараён старой яўрэйскай забудовы) і якія ўстановы раней у іх размяшчаліся.
