Дажынкі-2017 у ААТ “Граніт-Агра”
Дажынкі-2017 у ААТ “Граніт-Агра” Стала добрай традыцыяй у ААТ “Граніт-Агра” праводзіць свята Дажынкі, свята ўраджаю, свята падвядзення вынікаў. Вось і сёння 26 жніўня адбыліся Дажынкі ў аг. Круцілавічы. Вакол галоўнай сцэны былі ўзведзены цуда-скульптуры з рулонаў саломы: паравозік, які сустракаў гасцей пры ўездзе у аг. Круцілавічы; і кароўка, і дядуля з бабуляй, і вусеніца. На пачатку свята адбыўся адзін з самых сімвалічных момантаў: на галоўную сцэну дзяўчынкі ў нацыянальных касцюмах прынеслі караваі, выпечаныя з ураджаю гэтага года. Ксёндз Віктар і айцец Валерый асвяцілі караваі новага ураджаю. З прыветным слова да ўсіх прысутных звярнуўся дырэктар ААТ “Граніт-Агра” Станіслаў Станіслававіч Мазур. Павіншавала са святам і старшыня Данілавіцкага сельскага выканаўчага камітэта Ганна Мікалаеўна Жых. Затым адбылася асноўная афіцыйная падзея Дажынак — уручэнне ўзнагарод удзельнікам жніва. З музычнымі падарункамі выступілі Вячаслаў Статкевіч – артыст беларускай эстрады, Васіль Асіповіч, Святлана Шыманская лаўрэат міжнародных і рэспубліканскіх конкурсаў і фестываляў, вядомы спявак, легенда айчыннай сцэны Уладзімір Ухцінскі. Для дзяцей на працягу свята працавалі атракцыёны: батут, надзіманыя горкі, можна было пакатацца на машынках; прадавалі салодкую вату, папкорн; вялася таргоўля салодкімі пачастункамі і сувенірамі. Вядома, праца на зямлі – гэта сапраўднае выпрабаванне сілы духу і характару. А хлеб — быў, ёсць і будзе сімвалам росквіту і дабрабыту народа. Сабраны ўраджай – гэта вынік карпатлівай і дружнай працы.
“Скарбы Гродзеншчыны”
Рэгіянальны фестываль традыцыйнай культуры “Скарбы Гродзеншчыны” 26 жніўня на тэрыторыі Аўгустоўскага канала (каля шлюза Дамброўка) размясціліся падворкі традыцыйнай культуры “Бацькоўскую спадчыну захаваем навякі”, на якіх “раскінуліся” выстаўкі-прэзентацыі элементаў нематэрыяльнай культурнай спадчыны Гродзеншчыны “З народных глыбінь да сённяшніх дзён”. На Дзятлаўскім падворку быў прадстаўлены першы элемент нематэрыяльнай культурнай спадчыны Гродзеншчыны – абрад “Юр’я”, як адметнае праяўленне лакальнай культурнай традыцыі. Дзятлаўскі падворак зазываў гасцей на майстар-класы традыцыйных рамёстваў, вышыўку прадэманстравала Таццяна Загорцава, пляценне паясоў — Ларыса Ненартовіч, быў прадстаўлены народны касцюм, які бытаваў на Дзятлаўшчыне, традыцыйныя стравы, пабытовыя танця. Спецыяльнымі дыпломамі і прызамі ўзнагароджаны: народны фальклорны калектыў в. Погіры —“за папулярызацыю мясцовых танцавальных традыцый”; народны фальклорны калектыў в. Студзераўшчына (кіраўнік Аліна Мішчук) —“лепшы фальклорны калектыў”. На інтэрактыўнай пляцоўцы “Танцавальная вясельніца” выконваўся майстар-клас “Кракавяк ў тройках” ад народнага фальклорнага калектыва в. Погіры (кіраўнік Тамара Ступак) сектара па арганізацыі дасуга “Жукоўшчынскі Дом культуры”. На пляцоўцы “Кошык весялосці” народны тэатр-студыя гульні “Прымакі” (кіраўнік Янушкевіч Таццяна) прапанаваў гульнёва-забаўляльную праграму “На Зецяльскім кірмашы”.
Пасёлак любы, сэрцу дарагі
Пасёлак любы, сэрцу дарагі Пад такой назвай 26 жніўня адбылося ваенна-спартыўнае свята ў пасёлку Гезгалы. Свята праводзілася ўпершыню. Запрашэнне на яго атрымалі ўсе, хто служыў і працаваў у колішнім ваенным гарадку. Прысутных павіталі старшыня Жукоўшчынскага сельвыканкама Валерый Верамейчык і старшыня мясцовай пярвічнай арганізацыі ветэранаў вайны, працы і Узброеных Сіл Аляксандр Волкаў. Прысутным былі адрасаваны пажаданні прыемна бавіць час, добра адпачыць. — Сёння цяжка ўявіць, што 20 гадоў таму амаль увесь пасёлак насіў пагоны, — зазначыў Аляксандр Волкаў. – Але тут засталіся і жывуць ваенныя пенсіянеры. Радасна бачыць знаёмых былых вайскоўцаў, а засмучае тое, што з гадамі нас становіцца менш. Таму здароўя ўсім і дабра. Больш за 30 гадоў гезгалаўскія ракетчыкі былі ў складзе войск стратэгічнага прызначэння. І менавіта тут адбылася адметная падзея: 27 лістапада 1996 года былі вывезены апошнія балістычныя ракеты. Беларусь набыла статус без’ядзернай дзяржавы, стала першай у свеце краінай, якая адмовілася ад ядзернай зброі добраахвотна. Да віншаванняў дадалі свае музычныя падарункі ўзорны ансамбль скрыпачоў “Зорачкі”, танцавальная група і Наталля Капковіч. Затым гасцей свята запрасілі паглядзець на паказальныя выступленні ратаўнікоў. Можна было пабачыць амуніцыю і прылады, якія выкарыстоўваюць работнікі Дзятлаўскага раённага аддзела па надзвычайных сітуацыях. Дзятва імкнулася пасядзець за рулём пажарнай машыны, а бацькі – зрабіць пабольш фотаздымкаў. Асаблівае захапленне выклікалі ў гледачоў “фантаны” і магутныя струмені вады, падаваемай з устаноўкі. Сельская вясёлая эстафета “Адзін у полі не воін” прадоўжыла святочную праграму. Камандам давялося прайсці выпрабаванні ў пяці конкурсах. На пачатку – сабрацца па баявой трывозе, а затым – пераадолець “балота”, падарваць танк, пахадзіць на “лыжах”. У апошнім жартоўным выпрабаванні – хуценька пацалаваць дзяўчыну. Музычную частку свята склалі выступленні духавога аркестра з Наваельні і дзіцячая канцэртная праграма патрыятычнай песні “Няхай заўжды будзе сонца”. Аркестранты прапанавалі паслухаць вядомыя музычныя кампазіцыі, а юныя спевакі – песні ваенных гадоў “Смуглянка”, “Кацюша”, песні пра Радзіму. На гэтым мерапрыемства не закончылася. Жыхароў пасёлка і гасцей запрасілі ў аддзел культуры і дасуга “Гезгалаўскі Дом культуры” на канцэрт заслужанага калектыву Рэспублікі Беларусь ансамбля танца, музыкі і песні “Белыя росы”. На працягу свята працавалі гандлёвыя кропкі. Госці свята мелі магчымасць паспытаць салдацкую кашу. Для малечы працавалі атракцыёны. Прыватныя прадпрымальнікі гандлявалі папкорнам, цацкамі. Можна было пастраляць у ціры і зарабіць прыз.
Абласны фестываль рэгіянальнага фальклору “Панямоння жыватворныя крыніцы”
Абласны фестываль рэгіянальнага фальклору «Панямоння жыватворныя крыніцы» Абласны фестываль рэгіянальнага фальклору «Панямоння жыватворныя крыніцы» праводзіцца з мэтай захавання, развіцця і прапаганды традыцыйнай народнай творчасці Гродзеншчыны, далучэння дзяцей, падлеткаў, моладзі да гісторыка-культурнай спадчыны сваёй краіны, выяўленню самабытных носьбітаў беларускага фальклору, папулярызацыі іх творчасці, пашырэння межаў іх дзейнасці. Фестываль рэгіянальнага фальклору ахоплівае ўсю Гродзенскую вобласць. На ім прадстаўляюцца дасягненні рэгіянальнай культуры кожнай, нават самай маленькай вёсачкі Гродзеншчыны. Дзятлаўшчына была прадстаўлена калектывамі мастацкай творчасці: народны фальклорны калектыў. в. Студзераўшчына, народны фальклорны калектыў в. Погіры. Па выніках фестывалю: намінацыя “індывідуальны выканаўца (сольныя спевы, дуэты)” — Марыя Шыдла, удзельніца народнага фальклорнага гурта в.Погіры сектара па арганізацыі дасуга “Жукоўшчынскі Дом культуры” ДУК “Дзятлаўскі раённы цэнтр культуры і народнай творчасці”; намінацыя “аўтэнтычны фальклорны гурт” Лаўрэат І ступені — народны фальклорны гурт в.Студзераўшчына дома фальклору в.Студзераўшчына ДУК “Дзятлаўскі раённы цэнтр культуры і народнай творчасці”. Кіраўнік – Аліна Мішчук. Лаўрэат ІІ ступені -народны фальклорны гурт сектара па арганізацыі дасуга “Жукоўшчынскі Дом культуры” ДУК “Дзятлаўскі раённы цэнтр культуры і народнай творчасці”. Кіраўнік – Тамара Ступак.