🌟КУХНЯ З ВОДАРАМ ТРАДЫЦЫЙ

У кожным доме на Калядныя святкаванні ўспамінаюць рэцэпты страў, якія перадаюцца з пакалення ў пакаленне, захоўваючы традыцыйнае прыгатаванне, ці прыбліжанае да яго.

На Дзятлаўшчыне, перад калядамі, на посную куццю, варылі пярловую кашу з макам – куццю, грыбны квас,грыбныя вушкі, рабілі хатнія ламанцы, гэта самаробныя печаныя, посныя коржыкі, якія размочвалі ў гарачай салодкай вадзе з макам, варылі белы аўсяны і чырвоны кісель, абавязкова на стале быў селядзец.Лічылася, што на посную куццю на стале павінна быць 12 страў.

 На Шчадрую куццю стол быў святочны. Кожная гаспадыня выстаўляе самыя смачныя стравы. У некаторых вёсках абавязкова ў печы варылі свіное вуха (в. Погіры), грыбны квас і вушкі (в. Ахонава), пяклі каўбасу (в. Данілавічы) , жарылі мяса, бліны-аладкі (в. Страла)на розны густ, верашчайку з салам, мясам і цыбуляй. А яшчэ пяклі смачныя пірагі.